चित्रकार मिलिंद ठाकूर यांच्या 'रंगोत्सव २०२६' चा उरणमध्ये दिमाखदार सोहळा. मोबाईलच्या आभासी जगात हरवलेल्या बालमनाला कलेची संजीवनी; चित्रकार मिलिंद ठाकूर यांनी मांडला उपक्रमाचा हेतू.
उरण : सुनिल ठाकूर
येथील 'योशिता आर्ट' आणि 'मथुरा महादेव एज्युकेशन सेंटर' यांच्या संयुक्त विद्यमाने आयोजित सात दिवसीय 'रंगोत्सव २०२६' कॅनव्हास पेंटिंग कार्यशाळेचा समारोप जेएनपीए स्टाफ क्लब येथे एका ऐतिहासिक कला प्रदर्शनाने संपन्न झाला. या सोहळ्यात चिमुकल्या हातांनी साकारलेल्या रंगांच्या किमयासोबतच, शैक्षणिक क्षेत्रातील उत्तुंग यश संपादन करणाऱ्या कन्यांचाही गौरव करण्यात आला.
मोबाईल संस्कृतीवर कलेचा प्रहार:
कार्यक्रमादरम्यान उपस्थितांशी संवाद साधताना प्रसिद्ध चित्रकार मिलिंद ठाकूर यांनी या उपक्रमामागची आपली सामाजिक भूमिका अत्यंत प्रभावीपणे मांडली. ते म्हणाले की, "आजचा विद्यार्थी मोबाईलच्या आभासी दुनियेत स्वतःला हरवून बसला आहे. या अतिवापरामुळे मुलांमधील उपजत कलागुण आणि कौशल्यांचा त्यांना विसर पडत असून, अनेक विद्यार्थी मानसिक तणावाखाली वावरत आहेत. या धोक्यापासून विद्यार्थ्यांना वाचवण्यासाठी, त्यांना मानसिक बळ देण्यासाठी आणि त्यांच्यातील सुप्त गुणांना उजाळा देण्यासाठी 'रंगोत्सव २०२६'चे आयोजन करण्यात आले आहे. प्रत्येक विद्यार्थ्यामध्ये नवनिर्मितीची ताकद असते, ती बाहेर काढून कॅनव्हासवर मांडण्याची संधी देणे हाच आमचा मुख्य हेतू आहे."
*यशाचा जागर: हिताक्षी आणि सलोनी यांचा विशेष सत्कार:*
या सोहळ्याचे मुख्य आकर्षण ठरले ते म्हणजे शैक्षणिक क्षेत्रात गरुडझेप घेणाऱ्या दोन सुकन्यांचा सत्कार!
* कुमारी हिताक्षी मुकुंद ठाकूर: सीबीएसई १० वीच्या परीक्षेत ९५.६% असे घवघवीत यश मिळवून उरण आणि पनवेल तालुक्याचा नावलौकिक वाढवणाऱ्या हिताक्षीचा सत्कार सोहळा अत्यंत उत्साहात पार पडला. तिची जिद्द आणि कष्टाचे कौतुक करताना उपस्थितांनी टाळ्यांचा कडकडाट केला.
* कुमारी सलोनी सचिन कडू: एमबीए आणि सीए (MBA, CA) सारखी प्रतिष्ठेची पदवी संपादन करून यशाचे शिखर सर करणाऱ्या सलोनीच्या रूपाने विद्यार्थ्यांसमोर एक नवा आदर्श ठेवण्यात आला.
या दोन्ही गुणवंतांना मथुरा महादेव एज्युकेशन सेंटर आणि योशिता आर्ट तर्फे मान्यवरांच्या हस्ते सुवासिक पुष्पगुच्छ आणि विशेष भेटवस्तू देऊन सन्मानित करण्यात आले. हा क्षण पालकांसाठी अत्यंत अभिमानास्पद आणि विद्यार्थ्यांसाठी प्रेरणादायी ठरला.
या सोहळ्याला उद्घाटक पाहुणे पत्रकार माननीय श्री. सुनील ठाकूर, पत्रकार माननीय सौ. तृप्ती भोईर, शिक्षक नेते श्री. रमाकांत गावंड सर, मुख्याध्यापक माननीय श्री. अंकुश जोगळे याप्रसंगी मान्यवर पाहुण्यांमध्ये ज्येष्ठ सामाजिक कार्यकर्ते माननीय श्री. एकनाथ घरत, सिडकोचे माननीय श्री. सचिन कडू (C.A.), शिवसेना शाखाप्रमुख माननीय श्री. अविनाश म्हात्रे, ज्येष्ठ सामाजिक कार्यकर्ते माननीय श्री. किशोर कडू, आणि जेएनपीटीचे सामाजिक नेते माननीय श्री. बळीराम घरत तसेच माननीय श्री. भूपेंद्र डाकी यांची प्रमुख उपस्थिती लाभली होती. या सर्व मान्यवरांच्या हस्ते सहभागी विद्यार्थ्यांना प्रमाणपत्रे प्रदान करण्यात आली.
विद्यार्थ्यांनी साकारलेले कॅनव्हास पाहून उपस्थित पालक आणि रसिक प्रेक्षक भारावून गेले होते. मुलांच्या सर्वांगीण विकासासाठी चित्रकार मिलिंद ठाकूर यांनी राबवलेला हा उपक्रम उरण परिसरात कौतुकाचा विषय ठरला आहे.
